काठमाडौँ । नेपालमा विदेशी दूरसञ्चार सेवा प्रदायक कम्पनीका सिम कार्ड तथा रिचार्ज कार्ड बिक्री गर्न नियामक निकाय नेपाल दूरसञ्चार प्राधिकरण को स्वीकृति लिनुपर्ने भएको छ।

प्राधिकरणले बिहीबार एक सूचना जारी गर्दै सम्बन्धित सरोकारवालाहरूलाई यस्तो नियम अवगत गराएको हो।

सूचना अनुसार, विदेश यात्रा गर्ने व्यक्तिहरूलाई लक्षित गरी नेपालमा सिम कार्ड तथा रिचार्ज कार्ड बिक्री वितरण गर्न प्राधिकरणबाट ‘नो अब्जेक्सन’ लिनु पर्ने व्यवस्था गरिएको छ।

यसको मतलब, सम्बन्धित व्यक्तिहरूले प्राधिकरणबाट स्वीकृति लिएर मात्र यस्तो सेवा प्रदान गर्न पाउनेछन्।

प्राधिकरणका प्रवक्ता सन्तोष पौडेलले यस्तो स्वीकृति नलिई कार्य गरेको पाइएमा प्रचलित कानुन अनुसार कारबाही गरिने बताएका छन्। यसले गर्दा विदेशी दूरसञ्चार सेवा प्रदायक कम्पनीहरूले नेपालमा आफ्ना सिम कार्ड तथा रिचार्ज कार्ड बिक्री गर्नु अघि प्राधिकरणबाट अनुमति लिनुपर्ने भएको छ।